ليا واحد صاحبي شيخ معالج روحانى . وانا كنت حابب ادخل واشوف العالم ده فطلعت معاه كام جلسه
فى بعض الجلسات كنت بشوف حاجات تشيب الشعر .بس حبيت الموضوع خصوصا اني حسيت انها مغامرات وانا بطبعي بحب اغامر
المهم الكام جلسه دول اتعلمت منهم شوية حاجات وجمدوا قلبي حبتين. وافتكرت اني كدا بئيت معالج وبالفعل اعلنت قدام بعض الناس اني اصبحت بعالج.
مافيش اسبوع و واحد صاحبي اتصل بيا ف نص الليل وقالي الحقني بالله عليك .
قولتله خير يافندم فيه ايه ؟؟.
قالي اخويا متحول علينا وعمال يكسر ف البيت ويطلع اصوات غريبه وبيشتمنا وبيهددنا انه هيموتنا ومش قادرين عليه .. مش انت قولت انك بتعالج ؟! تعالي بالله عليك الحقه والحقنى قبل ماتحصل حاجه.
قولتله انا هلبس وجاي اهو مسافة السكه.
طبعا انا كنت فرحان اني طالع لحاله لوحدي وف نفس الوقت خايف لانها اول مره بس اتغلبت ع خوفي وروحتلهم.
اول مادخلت البيت لاقيت التلفزيون متكسر وحاجات كتير ف البيت متدغدغه وناس كتير قاعده ف صالة البيت وكلهم منتظرين البطل ال جاي ينقذهم الي هو انا.
والاوضه الي في وش الصاله بابها مقفول و واخو الراجل دا عمال يخبط ويرزع ع الباب ويقول كلام مش مفهوم وشويه يشتم ويهدد فعلا.
طبعا انا دخلت بكل ثقه وقولتلهم ماتقلقوش خير بإذن الله … انا بس عايز حد يفهمني ف ايه وهو كان بيشتكي من حاجه قبل كدا او عمل حاجه غلط او رمي مياه سخنه ف الحمام او علي صوته ف الحمام او اي حاجه شبه كدا؟ قالولي لا ابدا هو فجأة لقيناه بالشكل دا.
قولتلهم طيب ماتقلقوش اقل من نص ساعة وكل دا هينتهي ان شاء الله انا بس عايز اتنين او تلاته صحتهم حلوة يدخلوا معايا عشان يمسكوه كلهم بصوا لبعض وماحدش فيهم نطق … الباشوات خافوا.
بصراحه عندهم حق ! والحاله دا لو شوفتوه هيجيلكم صرع عامل زي درفة الباب وطالعله بني ادمين ف دراعاته .كررتلهم نفس الكلام تاني ف برضو بصوا لبعض وسكتوا.
المهم روحت باصص للناس بصة استهزاء بهم ؟؟ وانه ايه يعني ولا يفرق معايا واني مستعد ادخل لوحدي خصوصا ان فيه ناس كتير ودا ف حد ذاته هيبئا احلي دعاية ليا بعد كدا .
وروحت فاتح الباب وداخل وانا خطواتي كلها ثقه .. اول مادخلت ببص لاقيت رضا رافع لوح خشب ببص ورايا لاقيت سيد اخوه شاف المنظر راح جاري بره وقافل باب الاوضه عليا انا والحاله .
انا شوفت المنظر كان هيجيلي سكته قلبيه بس مسكت نفسي وشخط فيه وقولتله ارجع لأحرقك . لقيته برق ليا وعينه مليانه غضب روحت راسم الدايره بسرعة ولسه هقرأ لاقيته داخل عليا بلوح الخشب .
وفى لحظه نسيت كل القرءان ال انا حافظه وفضلت اقوله ارجع لاحرقك ارجع لاحرقك .. رد قالي تحرق مين يابن ال……تييييييييت ونزل ضرب فيا لحد ماكسر لوح الخشب عليا.
العفريت طلع مبرشم
فضلت اصرخ وازعق بأعلي صوتي واستغيث بال بره وارجع اقوله ارجع لاحرقك وان حد من ال بره يلحقني .. لكن لا حياة لمن تنادي ، وفضل يضرب فيا بايده ورجله وإني اقاومه ولا اشتمه حتي ! مفيش.
لحد مافقدت الوعي وفتحت عيني ف المستشفي لاقيت ايدي الاتنين و رجلي الشمال متجبسين وكدمات ف جسمي وعرفت هناك ان الناس دخلت لحقوني بس بعد ماتعدمت العافيه وان الحاله دا اصلا طلع شارب مخدرات و واخد حبوب اسمها ابتريل بتخليها تغيب منه وتقلب ب شر … لاء وقال وانا ال كنت برسمله دايره وبقوله ارجع لاحرقك ؟؟ ومن يومها قلت توبه .
سفنكس نيوز
أرسل بريدا إلكترونيا
الجمعة - 19 ذو الحجة - 1444هـ / 7 يوليو - 2023م / 10:22 صباحًا
